په بلخ پوهنتون کې د مالي او اداري چارو مرستيال په مشرۍ د اداري کارکوونکو سره د کارونو په روڼتيا او چټکتيا اداري ناسته وشوه!
نن چهارشنبه د ۱۴۴۷ھ ق د جمادی الثانی مياشتې په ۱۲ مه، په بلخ پوهنتون د مالي او اداري چارو مرستيال په مشرۍ د اداري کارکوونکو سره د کارونو په روڼتيا او چټکتيا اداري ناسته وشوه، د يادې ناستې پيل د قران عظيم الشان په تلاوت سره وشو.
د ناستې په پرانيستې وينا کې د بلخ پوهنتون مالي او اداري چارو مرستيال الحاج مولوي بخت محمد «مومن یار» په خپله وينا کې وويل چې د بلخ پوهنتون ډېر علمي او کادري شخصيتونه لري او د خوښۍ ځای دی چې ښه په اخلاص د وطن خدمت کوي.
ښاغلي مرستيال په خپلو خبرو کې د يوې ادارې لپاره هماهنګي ډېره مهمه وګڼله او ويې ويل چې په کومه اداره کې هماهنګي نه وي له پرمختګ وروسته پاتې کېږي.
دغه راز ښاغلي مرستيال د ناستې ټولو ګډونوالو څخه هيله وکړه چې د يو بل سره همکاره پاتې شئ، انسان نيمګړی دی، د نه پوهېدو په صورت کې پوښتنه وکړئ، پوښتنه عيب نه، بلکې ناپوهه پاتې کېدل عيب دی، انتقاد ومنئ، او د اصلاح لپاره يې جدي کار وکړئ.
د يادونې ده چې په دغه اداري ناسته کې د مالي او اداري چارو اړوند د تدارکاتو، مالي او حسابي، کار کوونکو، معلوماتي ټکنالوژۍ او د اړيکو او عامه پوهاوي آمرينو او مدير صاحبانو کډون درلود.
بلخ پوهنتون د اړيکو او عامه پوهاوي آمريت
