د رهبرۍ شورا ناسته تر سره شوه.
نن دوشنبه د ۱۴۴۵/۶/۲۵ھ.ق چې د ۱۸/۱۰/۱۴۰۲ھ.ش نېټې سره برابره ده بلخ پوهنتون د رهبرۍ شورا ناسته د دې پوهنتون رئیس ښاغلي مفتي صاحب محمد شریف ابو عاصم عثماني په مشرۍ د دفتر آمر حافظ شېرمحمد احمدي له خوا د قرآنکریم په مبارکو آياتونو سره پيل شوه.
یاده ناسته کې چې د بلخ پوهنتون د علمي چارو، مالي او اداري، محصلانو، او څېړنيزو چارو مرستیالانو ګډون کړى وو لومړى دبلخ پوهنتون رئیس ښاغلي مفتي صاحب محمد شریف ابو عاصم عثماني دښه راغلاست ترڅنګ په خپلو پيليزو او لارښوونيزو خبرو په ترڅ کې مرستیالان خپلمنځي او درياست سره همغږۍ ته را وبلل او دَ کتابتون تصفیې، دَ دعوت او ارشاد لپاره د سيمينار بوديجې، ترانسپورت، دَ اسنادو دَ ويش لړۍ، د څېړنو معاونيت لپاره دځاى او داسې نورو برخو کې دَ معلوماتو غوښتنه وکړه.
ورپسې دعلمي چارو مرستیال پوهنمل مولوي حيات الله حقجو کتابتون تصفيې لپاره دَ کمېټې جوړولو په اړه خپل دریځ څرګند کړ. مالي او اداري مرستیال ښاغلي قاضي عبدالهادي فضلي هم سيمينارونو لپاره دَ بودیجې، ترانسپورت، دَ استادانو علمي اثر او دَ هغه په مالي برخه رڼا واچوله ښاغلي فضلي همداراز دَ اداري کارکوونکو له خدمتي ځايونو څخه خپل ځايونو ته دَ راوستلو غوښتنه وکړه.
له هغه وروسته بيا دمحصلانو چارو مرستیال پوهنوال محمد شریف امين د اسنادو وېش لړۍ ټکني کېدو لامل دَ اداري کارکوونکو کمښت ياد کړ چې دَ کار کونکو په ډېرښت سره به ياده ستونزه له منځه لاړه شي.
په پاى کې دَ رئیس له خوا ورته دَ شته ستونزو دَ حل په اړه اړينې سپارښتنې وشوې. همداراز دَ اداري کارکونکو له خدماتي ځايونو څخه بېرته خپلو ځايونو ته راتلو په هکله پریکړه وشوه.
ناسته په دعا کولو سره پاى ته ورسېده.
دبلخ پوهنتون د عامه پوهاوي او اړيکو آمريت.
