د بلخ پوهنتون ښوونې او روزنې پوهنځي د (قلم)په نوم جريده خپره کړه!
دوشنبه د روان ۱۴۴۷ھ ق کال د ربیع الثانی مياشتې په ۲۰مه د بلخ پوهنتون ښوونې او روزنې پوهنځي د (قلم) په نوم جريده خپره کړه.
د دغه جريدې د لګولو په مراسمو کې د دغه پوهنځي استادانو، اداري کارکوونکو او ګڼ شمېر محصلانو د خپرېدو هر کلی وکړ او ياده جريده يې د پوهنځي د علمي او ادبي چاپېريال د لا پياوړتيا په لور مهم ګام وباله.
د ويناوالو په نظر «قلم» جریده د پوهنيزو، فکري او ادبي هڅو د راټولولو او خپرولو لپاره يو مهم علمي منبر دی، چې د استادانو او محصلينو د استعدادونو د ودې او د فکري تبادلې د فضا د رامنځته کولو لامل ګرځي.
دغه راز د ياد پوهنځي استاد پوهنيار نعمت الله«شريفي» وویل:«په ښوونې او روزنې پوهنځي کې قلم جریده د علمي او فکري تجربو د تبادلې تر ټولو اغېزمنه وسیله ده، چې د محصلانو د خلاقیت او ژبني مهارتونو د ودې لپاره عملي زمینه برابروي»
ګډونوالو د جريدې د مسوول مدير او د دې خپرونې د ټیم هڅې وستاېلې او له ټولو استادانو او محصلينو يې وغوښتل، چې د راتلونکو ګڼو د بډای کولو لپاره خپلې ليکنې او علمي مطالب ور واستوي.
بلخ پوهنتون د اړيکو او عامه پوهاوي آمريت.
