په بلخ پوهنتون کې څه باندې ۲۳ میلیونه افغانیو په لګښت د داخلي سړک درېیم فاز چارې پیل شوې!
د بلخ پوهنتون داخلي سړک درېیم فاز د جوړولو چارې د پوهنتون رهبرۍ په حضور کې، د ۲۳ میلیونه، ۱۵۲ زره او ۷۶۰ افغانیو په لګښت په رسمي ډول پیل شوې.
د یادې پروژې له مخې، د داخلي سړک درېیم فاز ۵۵۰ متره اوږدوالی او ۲۵ متره پلنوالی لري. په دې پروژه کې دوهاړخیز معیاري سړک په پام کې نیول شوی، چې د سړک د هرې برخې پلنوالی شپږ متره دی. چې د دواړو سړکونو ترمنځ منځنی ګلدان او د سړکونو دواړو غاړو ته د اوبو د لېږد لپاره ویالې او شنې ساحې په پام کې نيول شوې دي.
د دې پروژې په کړنلاره کې د سړک جوړونې ترڅنګ د پوهنتون محوطې د عمومي نظم، ښکلا، شنو ساحو پراختیا او د تګراتګ د اسانتیاوو رامنځته کولو ته هم ځانګړې پاملرنه شوې ده، چې له بشپړېدو سره به یې د پوهنتون داخلي محوطې د ترانسپورتي او چاپېریالي وضعیت په ښه والي کې اغېز ولري.
د پروژې د پيل په مراسمو کې د بلخ پوهنتون رهبرۍ د سړک د ساختماني چارو د کیفیت، ټاکلي وخت، تخنیکي معیارونو او د پروژې کړنلارې مطابق د ټولو چارو پر پلي کېدو ټینګار وکړ.
د يادونې وړ ده، چې په بلخ پوهنتون کې به د داخلي سړک درېیم فاز په بشپړېدو سره به د پوهنتون د محوطې، د سړکونو د معیاري کولو برخه لا پراخه شي او د استادانو، کارکوونکو او محصلانو لپاره به د تګراتګ په برخه کې لا ډېرې اسانتیاوې رامنځته شي.
هېره دې نه وي چې په بلخ پوهنتون کې د نوموړې پروژې مالي لګښت د لوړو زده کړو وزارت له عادي بودیجې څخه ورکول کېږي او د ساختماني چارو د پلي کولو مسؤولیت یې بلخ استانبول آسیا نړیوال ساختماني شرکت پر غاړه لري.
نېټه: سې شنبه
۱۴۴۸/۵/۲۲ ھ ق
۱۴۰۵/۸/۱۲ ھ ش
د نشراتو او عامه اړيکو آمريت
