په بلخ پوهنتون کې د دعوت او ارشاد آمریت له لوري د استادانو او اداري کارمندانو لپاره جوړ شوی درې ورځینی سمینار پای ته ورسید!
په بلخ پوهنتون کې نن د کب په شپږمه د نوموړي درې ورځیني سمینار وروستۍ ورځ وه، چې د بلخ ولایت آمر بالمعروف و نهي عن المنکر رئیس شیخ الحدیث نور محمد حقاني د اسلامي نظام په ارزښت او امام ابوحنیفه رحمة الله علیه په مناقبو بحث وکړ.
بلخوا د دې ترڅنګ د وروستۍ ورځې د سمینار په دویمه برخه کې د بلخ پوهنتون د شرعیاتو پوهنځي رئیس مفتي شفیق الله مظهري د نیت او اخلاص او د مسلمان نېک اخلاق او تقوا تر سرلیکونو لاندې د قران او حدیث په رڼا کې د سمینار ګډونوالو ته معلومات ورکړل او زیاته یې کړه چې په تقوا سره د انسان رزق پراخېږي، د اخرت درجې لوړېږي او الله تعالی ته پرې د انسان ګرانښت حاصلېږي.
باید وویل شي چې، دغه درې ورځینی سمینار د بلخ پوهنتون دعوت ارشاد آمریت له لوري د کب میاشتې په څلورمه نېټه د یاد پوهنتون په مسجد کې پیل شوی و، چې د بېلابیلو علماوو له لوري، د تعصب زیانونه، د اسلامي امارت موقف او پالیسي، د کفر پېژندنه، ولا او برا، د امیر ګمارل، د امیر پر وړاندې د ملت مسوولیت ، د سنتو پیروي، په اسلام کې د ږیرې ارزښت او د ښځو حقوق، د جهاد فضلیت، د مسوولیت احساس، امانت داري او خیانت پرسرلیکونو بحث وشو او نوموړی سمینار نن دوشنبه د خیر په دعا سره پای ته ورسېد.
بلخ پوهنتون د اړيکو او عامه پوهاوي آمریت.
