په بلخ پوهنتون کې د کانکور ازموينه پيل شوه!
پنجشنبه چې د ۷/۴/۱۴۰۳ لمريز کال د بلخ پوهنتون کې د کانکور ملي ازموينه پيل شوه، د دغې ازموينې د پيل او آغاز لپاره د بلخ پوهنتون په تالار کې ځانګړي مراسم ترتيب شوي و.
د يادو مراسمو پيل د قران عظيم الشان په کلام سره وشو او ورپسې د بلخ پوهنتون رئيس مفتي محمد شريف عثماني د میلمنو هرکلی وکړ او له هر کلي وروسته يې د غونډې پيليزه خبرو کې استادانو او هیأتانو ته ددې ملي پروسې په اړه د روڼتیا سپارښتنه وکړه
په دغه غونډه کې د بلخ ولايت څخه د والي مرستيال م ول وي نورالهادي ابو ادريس په خپله وینا کې د غونډې ګډونوالو ته وويل: چې د دې وطن لپاره په اخلاص سره خدمت وکړئ، دعلم په مقتضا عمل ظاهر او باطن مو په شريعت برابر کړئ ترڅو د نظام واقعي استازي و اوسئ او کومه پوهه چې لرئ، د دې وطن ګلاليو بچيو ته يې په پوره اخلاص او ايماندارۍ ور انتقال کړئ او سالمه روزنه يې وکړئ.
د غونډې په پای کې د پلازمينې څخه د بلخ ولايت لپاره ځانګړي شوي پلاوي م ول وي محمد احمد حقاني ته نوبت ور ورسېد، هغه په خپلو خبرو کې ګډونوالو استادانو ته د روڼتیا سپارښتنه وکړه او ويې ويل چې د هيچا حق به نه خوړل کېږي.
نوموړي په خپلو خبره د بلخ ولايت لپاره دا زېری هم واوره چې په بلخ ولايت کې به د ازموينو ملي ادارې له لوري د کانکور پروسې د ښه تطبيق لپاره امريت جوړ شي، چې په نتیجه کې به يې د ګډنوالو ستونزې راکمې او حل شي.
دپاي په شېبو کې دپوښتنپاڼو مهر و لاک بکسونه د نوماندانو په وړاندې بېرته کړل شو.
د يادولو ده، چې دا ځل د بلخ ولايت څخه په دغه ازموينه کې ۴۶۱۲نوماندانو نوم ليکنه کړې وه، چې له جملې يې ۲۳۵۲تنو ازموينه ورکړه او پاقي پاتې به يې سبا جمعه د چنګاښ په نهمه نېټه ازموينه ورکړي.
ياده غونډه د خير په دعا سره پای ته ورسیده.
بلخ پوهنتون د اړیکو او عامه پوهاوي امريت
